It Frysk hat in hiele protte tiidwurden dy’t op -je útgeane, bygelyks studearje. Fan it type -earje binne der ytlike hûnderten. Faaks wol sa’n tûzen. Dy steane moai op in rychje yn it Omkearwurdboek fan de Fryske taal (Fryske Akademy, 1992, 470 siden). Alle oare je-tiidwurden, fan laabje (Holl.: ‘lasteren, kwaadspreken’) oant en mei sûzje (Holl.: ‘suizen’), steane dêr ek yn, mar wol fan efteren nei foaren op alfabet (retrograde folchoarder fan einletters). Se steane út soarte tige ferspraat tusken alle mooglike oare wurden en wurdsoarten en binne sadwaande net maklik te finen.

Sytze T. Hiemstra hat se (útsein de -earje-tiidwurden), foarsafier’t se geef Frysk binne, foar jo byinoar swile (alve siden fan fjouwer kolommen). Se hiene eins mei in oersetting yn it Hollânsk en Ingelsk opnommen wurde moatten yn in boekje lykas Tiidwurden fan de Afûk. Dy ynstelling woe dêr net oan. No jout it ynternet ús lokkich de mooglikheid ta fersprieding. De Hollânske wjergaders fan de tiidwurden binne te finen yn it Frysk Wurdboek Frysk-Nederlânsk (diel I; Fryske Akademy, 1984). Foar Ingelske oersettings kin it Frysk-Ingelsk wurdboek/Frisian-English Dictionary (Fryske Akademy/Afûk, 2000) rieplachte wurde.

Troch de ynfloed fan it Hollânsk op it Frysk driget it rike besit oan -je-tiidwurden te ferwurden ta -e-tiidwurden. Bygelyks: nammefoarm: hoopje/sakje-> *hope/sakke; notiid: hy hopet/sakket-> hy *hoopt/sakt; doetiid: hy hope/sakke-> hy *hoopte/sakte; hy hat hope/(is) sakke-> hy hat *hoopt/(is) sakt. Dêrom is it fan belang dat in sa grut mooglik ferskaat oan -je-tiidwurden yn en bûten it ûnderwiis op in goede wize faak en folle brûkt wurdt. Helpe jo mei?

*is ferkeard (d.w.s. in hollânisme)

Klik op: List mei -je-tiidwurden

Jo hawwe 'Adobe Acrobat Reader' nedich om de triemmen te iepenjen. Hjir kinne jo klikke om 'Adobe Acrobat Reader' oer te heljen: http://www.adobe.nl/products/acrobat/readstep2.html